Athletic talde lehiakorra da. Txapelketa hasi zenetik partida gutxitan izan da aurkaria baino gutxiago. Baina zelaian ikusitakoa ez da sailkapenean islatu. Eta futbolean puntuek balio dute. Ondo aritzea da garaipenak lortzeko biderik zuzenena, baina ez da nahikoa. Ez, behintzat, zuri-gorrientzat. Gaizka Garitanok asteartean esan zuen gisara, beti gertatzen zaie «zerbait». Bada, lehenbailehen konpondu beharreko arazoa da. Parekotasun handia dagoen ligan behera begira jarrita baitago talde zuri-gorria.
Hortaz, ezin du huts egin gaur San Mamesen, Huescaren aurka (21:00, Gol). Talde igo berria izan arren, oso ondo ari da lehiatzen. Gainera, hamar jardunaldi irabazi ezinik egon ostean, Alavesi irabazi zion pasa den larunbatean. Hortaz, norgehiagoka prestatzeko denbora gehiago izateaz gain, konfiantzaz gainezka zelairatuko da. Yeray Alvarezek eta Raul Garciak ez dute jokatuko, partida bateko zigorra bete behar baitute.
Superkopako finalerdiak
Bestalde, atzo zozkatu zituzten Espainiako Superkopako finalerdiak. Realak Bartzelona izango du aurkari urtarrilaren 13an, Kordoban (Espainia). Zuri-gorriek, berriz, Real Madrilen aurka jokatuko dute egun bat geroago, Malagan (Espainia). Irabaziz gero, abenduaren 17 an jokatuko lukete finala, Cartuja estadioan (Espainia). Hasieran, Saudi Arabian zen jokatzekoa Superkopa, baina Espainian jokatuko da, koronabirusagatik. Ez da izango ikuslerik.
Ondo aritzeaz gain, Athleticek irabazi beharra du gaur, etxean, Huescaren aurka
Iruzkinak
Ez dago iruzkinik
Ordenatu