Arrauna

Oriok beste kolpe bat eman dio Eusko Label ligari, eta gertu du lehen garaipena

Hondarribiko estropada irabazi zuen igandean, eta seigarren bandera lortu; tarteak zabaldu dizkie aurkariei. Isuntzak eskura du salbazioa
Gorka Aranberri garaipena ospatzen, herenegun, Hondarribian.
Gorka Aranberri garaipena ospatzen, herenegun, Hondarribian. IDOIA ZABALETA / FOKU

Aitor Manterola -

2019ko abuztuak 13
Oriorako bidean da aurtengo Eusko Label liga, eta lehen aldiz hartuko du norabide hori. Igandean, beste kolpe bat eman zion emaitza historikoa izan daitekeen horri, Hondarribiko estropadan bandera lortuz. Historia osoan bigarren aldiz astindu zuten oriotarrek Gipuzkoako herri horretako trapua, eta ligako seigarrena du. Aldeak handitu egin dizkie aurkariei: Santurtzi, Hondarribia eta Zierbena hamasei, hemeretzi eta hogeita sei puntura ditu, hurrenez hurren. Sei estropada baino ez zaizkie geratzen liga amaitzeko: Zarauzko biak datorren asteburuan, Galiziako biak hurrengoan, eta Bermeo eta Portugaletekoak Kontxako Bandera jokatu ondoren.

Estropada nahasia izan zen igandekoa, itsasoa ere halaxe zebilelako. Kaleen artean ere bazen alderik, kanpora joateko hobeak zirelako lehen biak; barrurako, aldiz, hobeto etorri ziren erdiko kaleetatik. Azkeneko txandan joan zen Orio, lehen kaletik, eta lehen ziaboga eman eta segituan utzi zituen atzean aurkariak, olatuak maisutasunez baliatuz. Ez zuen utzi burua, nahiz eta azken luzean gainera joan zitzaizkion Santurtzi eta Hondarribia, hirugarren ziabogan atzean bazituen ere. Epaileek hiru segundoko zigorra ezarri zieten etxekoei, bi aldiz bandera urdina atera zietelako. Horrenbestez, azken sailkapenean bosgarren izan ziren.

Oriok beste etsai bat ere izan zuen: bigarren txanda menderatu zuen Urdaibai. Lan oso ona egin zuten bermeotarrek, bezperan bezala, eta lau segundora bakarrik geratu zitzaizkien Oriokoei.

Atzeko lehia, biren kontua

KAE 1 ligara zer talde joango den eta zer kanporaketara erabakita egongo da Galiziako azken estropada jokatzean, lau estropada baino ez baitzaizkie falta ligako azken lau sailkatuei. Isuntzak aurrerapauso bat eman zuen igandean, larunbatean bezala. Txanda irabazteko gai izan zen Hondarribian, eta, orain, zortzi puntura du azken-aurrekoa, Astillero, eta hamarrera azkena, San Pedro. Ematen du espainiarren eta pasaitarren artean egongo direla jokoan azken bi postuak. San Pedrok bi puntu jan dizkio asteburuan Astillerori.

Irakurle agurgarria:

Honaino iritsi zarenez, eskaera bat egin nahi dizugu: irakurtzen ari zaren edukia eta egunkaria babestea, konpromiso ekonomikoa hartuz. Publizitatea eta erakundeen diru-laguntzak ez dira nahikoa BERRIAren etorkizuna bermatzeko. Sarean eskaintzen dizugun edukia irakurtzen duzuen milaka irakurleek proiektuari ekarpena eginda, urrutira iritsiko ginateke.

Kazetaritza libre, ireki eta independentea egin nahi dugu euskaldunontzat. Euskaraz informatzea delako gure eginkizuna, eta zure eskubidea.Lagun gaitzazu bide horretan. Idatzi gurekin etorkizuna. Geroa zugan.

Martxelo Otamendi
BERRIAko zuzendaria

Izan zaitez BERRIAlaguna
Aitor Manterola

Informazio osagarria

Izan zaitez BERRIAlaguna

Irakurtzen ari zaren edukia libre ematen jarraitu nahi dugu. Euskaraz informatzea da gure eginkizuna, zure eskubidea. Sareko irakurlea bazara, konprometitu zaitez irakurtzen ari zarenarekin. Geroa zugan.

Izan zaitez BERRIAlaguna