Albistea entzun

Celta 2-0 Osasuna

Zalantzati segitzen du oraindik

Osasuna bigunegi aritu da Celtaren zelaian, eta esku hutsik gelditu. Ongi ekin dio lehiari, baina ez da gai izan Mallo eta Minaren golei erantzuteko
Budimir eta Moncayola Osasunako jokalariak, burumakur, atzo, Celtaren aurkako partidan, Balaidosen.
Budimir eta Moncayola Osasunako jokalariak, burumakur, atzo, Celtaren aurkako partidan, Balaidosen. SALVADOR SAS / EFE Tamaina handiagoan ikusi

Eñaut Agirrebengoa -

2022ko urtarrilak 20

Golak. 1-0 Hugo Mallok (29. min). 2-0 Santi Minak (38. min).

Osasuna ez da oraindik erabat suspertu. Airean jarraitzen dute txakalaldiak eragindako zalantzek, atzo Celtaren zelaian agerian gelditu zenez. Gorritxoak sendotasun handiz nagusitu zitzaizkion Cadizi azken jardunaldian, baina okerreko bidera itzuli ziren Balaidosen. Asmo onak zituzten, eta gogoz jokatu zuten; lehiatzeko gaitasuna falta izan zitzaien, ordea. Aurkaria baino askoz gutxiago izan gabe, bi gol jaso zituzten lehen zatian, eta gero, ez ziren gauza izan markagailuko aldea murrizteko. Ahaleginak eta bi egin zituzten, baina hortzak kamustu egiten zaizkie aurkariak atzean gotortzen zaizkienean.

Koronabirusak jota egon eta azken hiru partidak galdu ostean, atzo aulkira itzuli zen Jagoba Arrasate. Aridane, Unai Garcia eta David Garcia ez zeuden jokatzeko moduan, eta hala, harrobiko Unai Dufurren alde egin zuen apustu teknikari gorritxoak, defentsaren erdigunean Juan Cruzekin batera joka zezan. Bada, hauskor agertu zen Osasunaren atzeko lerroa, eta ezin izan zion Celtaren kalitateari eta eraginkortasunari eutsi. Etxekoek bi atzaparkada aski izan zituzten atsedenaren aurretik bi golen aldea hartu, eta, hala, garaipena ondo bideratuta uzteko.

Gehiegizko zigorra izan zen neurketari indarrez eta anbizioz ekin zion Osasunarentzat. Erritmo oso bizia ezarri zuen lehen ordu laurdenean, presio estu eta jokaldi azkarren bitartez. Erasoan, jarraibide garbi bat zuten nafarrek: jokoa albait azkarrena zabaldu behar zuten, gero areara erdiratzeko, Ante Budimirren bila. Kroaziarraren mehatxua etengabea izan zen lehiaren hastapenean, eta oso gertu izan zuen gola bederatzigarren minutuan: Vidalen pasea aurreneko ukituan errematatu zuen, baina langarekin egin zuen topo.

Apurka apaldu egin zen gorritxoen grina, Celta jokaldiak luzatzen hasi ahala. Galiziarrek baloia mugituz orekatu zuten lehia. Gehiegizko arriskurik ere ez zitzaizkion sortzen Osasunari, baina 29. minutuan kolpe gogorra eman zien Hugo Mallok. Hegaletik barrura sartu zen Celtako kapitaina, eta, area ertzeraino iritsita, ondo baliatu zuen Cervik bizkarrez emandako pasea. Sergio Herrerak kale egin zuen atepean. Bigarren golean, ordea, ezer gutxi egin zezakeen, ateko zuloan errematatu zuelako Santi Minak. Suarezek orpoz jokatu zuen Aspasekin, eta haren paseak gainditu egin zituen erdiko bi atzelariak.

Min egin zion Osasunari Minaren golak, eta burumakur iritsi zen atsedenaldira. Gero, berriz ere neurketan sartzen ahalegindu zen, ekimena hartu eta erasora joz. Celtaren zelaian jokatu zuen ia bigarren zati osoan; alta, argitasuna eta jokaldiak bukatzeko gaitasuna falta izan zitzaion. Nahia ezinarekin nahastu zen minutuek aurrera egin ahala. Arrasatek aldaketa erasokorrak egin zituen, eta debuta egiteko aukera eman zion Iker Benitori. Alabaina, ez zen golik iritsi, eta etsi egin behar izan zuen Osasunak.

Sareko BERRIAzalea:

Irakurri berri duzun edukia eta antzekoak zure interesekoak badira, eskari bat egin nahi dizugu: Berria diruz babestea.

Zuk eta zure gisako sareko milaka irakurlek egindako ekarpenarekin, eduki gehiago eta hobeak sortuko ditugu. Eta, zuekin osatutako komunitateari esker, publizitateak eta erakundeen laguntzek bermatzen ez diguten bideragarritasuna lortuko dugu.

Euskarazko kazetaritza libre, ireki eta konprometitua eskaini nahi dizugu egunero; bizi zaren munduaren eta garaiaren berri ematen segitu.

Albiste gehiago

Leila Ouahabi Bartzelonakoa eta Ada Hegerber Lyongoa lehian, duela hiru urteko finalean. ©TIBOR ILLYES / FOKU

Zirkulua itxi, edo irekita utzi

Ainara Arratibel Gascon

Bartzelonak eta Lyonek Txapeldunen Ligako finala jokatuko dute gaur. Euskal Herriko jokalari bana dago bi taldeetan: Irene Paredes Kataluniakoan, eta Damaris Egurrola Frantziakoan

 ©OSKAR MATXIN EDESA / FOKU

«Genuen erronka ikusita, denboraldia bikaina izan da»

Iñaki Berastegi

Zuazok aukera du zortzigarren amaitzeko sasoia. Rodriguezek dioenez, aurreko urteetako lanaren fruituak jasotzen hasi dira. Teneriferen aurka jokatuko dute gaur, Barakaldon (19:00).
Arnaud Demare atzo, Cuneoko podiumean, Giroan aurten hirugarren etapa irabazi zuela adierazten. ©MAURIZIO BRAMBATTI / EFE

Hirugarrenez ere, loria

Aitor Manterola Garate

Arnaud Demarek hirugarrenez irabazi du aurtengo Giroan, esprintean berriz. Romain Bardet (DSM) ez da atera, gaixorik zegoelako

Eibarko jokalariak, Stoichkov zoriontzen, Leganesen aurkako partidan. ©SD EIBAR

Asko dute jokoan gaur Eibar, Reala B eta Amorebietak

Berria

Oso bestelakoa da batzuen eta besteen egoera: Eibar igo egin daiteke, eta Reala B eta Amorebieta, aldiz, jaitsi

Astekaria

Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.

Iruzkinak kargatzen...