Etxerat-entzat «premiazkoa» da presoak hurbiltzea

Baikor dago Etxerat elkartea Espainiako Gobernuak espetxe politika aldatzeko duen asmorekin. Presoen senide eta lagunak «biktima potentzialak» direla salatu dute, eta Urtzi Errazkin bozeramaileak ohartarazi du presoak gerturatzea ezinbestekoa dela hori amaitzeko. Egoera, «larria» eta«presazkoa» dela esan dute, eta Espainiako Estatuari eskubideak eta legeak betetzea dagokiola.

Balorazio positiboa egiten dute Madrilera iritsi delako euskal gizartea, bertako instituzioak eta sindikatuak eskatzen ari zirena. Hala ere, gobernuaren asmoa ekintzaz gauzatzea nahi dute lehenbailehen: «Aurrerapauso bat izan da, baina hankak lurrean izan behar ditugu, gurean ez baita ezer aldatu».

Etxerat-ek espetxe politika berri bat eskatzen du, preso gaixo eta 70 urtetik gorakoak kaleratzea, sakabanaketa amaitzea eta presoek egun jasaten duten egoera hobetzea, nagusiki.

Joan den asteburuan, urrunketak eragindako urteko laugarren istripua gertatu zen. Zauriturik ez dago, baina Errazkinek dio zorte kontua dela, dispertsioa hasi zenetik hamalau lagun hil baitira bisitetarako bidaian. 700 euskal herritar inguru ibiltzen dira astebururo bisitetarako bidaietan, eta haien sufrimendua amaitzeko garaia dela salatu dute.