Sostengu zabala jaso du Hendaiako manifestazioak

Izan elkarte edota alderdi politiko, sostengu zabala izan du Hendaiako manifestazioak. Alderdi abertzaleek bat egin dute deialdiarekin: ABk, ezker abertzaleak, EAk, Alternatibak, Aralarrek eta Ipar Euskal Herriko EAJk sostengatu dute manifestazioa. Batera plataformak ere gogor salatu du Baionako suprefetak Hendaiako Herriko Etxeari igorritako gutuna: «Gertakari horrek berriz ere agerian uzten du, lege babesik ezean, euskararen aldeko herri mugimenduaren nahiz hizkuntza politiko publikoaren iraunkortasun eskasa». LAB eta ELA sindikatuek ere bat egin dute mobilizazioarekin. Euskal Herritik harago, Okzitaniako kalandreta ikastolen mugimenduak ere adierazi du elkartasuna.