Nafarroako ospitaleetan «egun zailak» espero dituzte

IRUÑEA. Javier Remirez Nafarroako Gobernuko bozeramaileak esan duenez, azken astean koronabirusaren intzidentzia eta transmisioa «moteltzen» ari da. Izan ere, kasuak %20 gutxitu dira joan den astetik, eta, Remirezek azaldu duenez, beheranzko joera dago oraindik ere. Hala ere, adierazi du erietxeetan «egun zailak» espero dituztela, positiboen igoera eta ospitaleetako egoera ikusita: «Kasuak ugaritzen ari direla ikusi dugu ospitaleetan, nahiz eta atzoko datuek geldialdi bat erakusten duten».

Gobernuaren datuen arabera, 276 pertsona daude ospitaleetan, eta horietatik 37 ZIUetan. Remirezek adierazi du ospitaleetako okupazioa gora badoa ere bertan behera utzi dituzten ebakuntzak «gutxienekoak» direla.

Hala ere, gehitu du orain gobernuaren lehentasuna «ospitaleetako arreta» dela: «Hala eta guztiz ere, onkologiako kontsultak eta lehentasunezko kasuak martxan daude». Gaineratu du gobernuaren asmoa dela ospitaleak «ahalik eta arinen» bueltatzea ohiko egoerara.