Rajoyren hitzaldia eten dute, abortatzeko eskubide eske
Mariano Rajoy Espainiako Gobernuko presidentea Donostian zen atzo, EAEko PPren biltzarrean. Haren hitzaldiak itxi zuen bilkura. Hitza hartu eta berehala, ordea, geratu egin behar izan zuen, lau emakume oihuka hasi zitzaizkionean. PPko jarraitzaileen artean eserita zeuden laurak, eta Rajoy hizketan hasi zenean, altxatu, eta «abortu librea!» oihu egin zuten. «Gure gorputza, gure erabakia!» esanez ere egin zuten garrasi. PPko jarraitzaileek txalo eginez isilarazi nahi izan zituzten andreak, eta batzuk «gora bizitza!» oihuka ere hasi ziren. Segurtasun zaindariek atera egin zituzten, eta ertzainek, identifikatu. Rajoy presidenteak hitzaldiarekin jarraitu zuen ondoren, gertatutakoari aipamenik egin gabe.
Iruzkinak
Ez dago iruzkinik
Ordenatu