Ikasleen greba, hezkuntza sistema propioaren alde

BILBO. Euskal Herriko ikasleek greba egin zuten atzo, hezkuntza eredu propioa, publikoa, euskalduna, feminista eta denentzakoa aldarrikatzeko. Gora ikasleon borroka mugimenduak deituta, Bilboko, Baionako, Donostiako, Iruñeko eta Gasteizko kaleak hartu zituzten.

Salatu dutenez, Frantziako eta Espainiako hezkuntza sistema «elitista, matxista, merkantilista, antidemokratiko, atzerakoi eta segregatzaileek» menpean dauzkate euskal ikasleak, eta ez diete erantzuten euskal ikasleen «beharrei». Horrez gain, Baionako Bernat Etxepare lizeoko ikasleek aldarrikatu zuten baxoa euskaraz egiteko eskubidea daukatela.

Greba egin zuten ikasleei elkartasuna adierazi zieten, besteak beste, LAB sindikatuak, Bilgune Feministak, eta Ernai eta Aitzina gazte antolakundeek.