Trini Lopez aktore eta musikaria hil da, koronabirusak jota

MUSIKA. Trini Lopez mexikar jatorriko musikari eta aktore estatubatuarra koronabirusaren ondorioz hil zen atzo, 83 urterekin. 1960ko hamarkadan oso ezaguna egin zen, bere musikari lanagatik, batez ere. Rockabillya eta erritmo latinoamerikarrak uztartu zituen bere kantetan, eta sona handia lortu zuen If I Had A Hammer, I'm Comin' Home, Cindy eta Lemon Tree abestiekin, besteak beste. Aktore lanetan ere ibili zen The Dirty Dozen eta beste hainbat filmatan, baina arlo horretan ez zuen hainbesteko arrakastarik izan. 1960ko hamarkadaz geroztik, ez zuen sona handirik izan, baina haren urte loriatsuenen oihartzuna gaur egunera arte heldu da: hil baino denbora gutxi lehenago, Lopezen bizitzaren eta obraren inguruko dokumental bat grabatu zuten.P. David Ebersolek eta Todd Hughesek zuzendu dute Sinatra bera txunditzeko gai izan zen Trini Lopezi buruzko filma.