Kongresuak ez du tramiterako onartu trans legea

MADRIL. Atzo bozkatu zuten Espainiako Kongresuko osoko bilkuran trans legearen testu proposamena tramiterako onartzea, eta ez zen aitzinera atera, azken orduan PSOEk abstentziora jo zuelako. Trans legeak eztabaida piztu du Espainiako gobernu koalizioaren barruan. Izan ere, hilabeteak dira PSOEk Unidas Podemosen lege aurreproiektua blokeatuta daukala; hartara, oposizioak beste lege bat aurkeztu zuen, eta hori bota zuten atzera atzo. Bi puntu zituen testuak: transexualitatearen despatologizazioa eta genero autodeterminazioa. PSOEk adierazi zuen atzoko lege testuak «hutsune juridikoak» dituela, eta horregatik jo duela abstentziora. EH Bilduk eta EAJk alde bozkatu zuten.