Alaveseko hiru jokalarik koronabirusa dute

KORONABIRUSA. Alaveseko hiru jokalarik koronabirusa daukate. Sintomarik gabe daude, eta «osasun egoera onean» daudela jakinarazi du Alaves-Baskonia taldeak. Aurreko larunbatean, futbol taldeko entrenatzaile multzoko kide batek eta kirol zuzendaritzako beste batek positibo eman zuten, eta, ondoren, Alaveseko eta Baskoniako langile eta jokalari guztiei probak egingo zitzaizkiela jakinarazi zuen taldeak. Hor azaldu dira hiru kasu berriak. Orain, denera, hamar kidek dute gaitza Alavesen; hiru jokalari horiez gain, entrenatzaile taldeko zazpi kide ere kutsatuta daude.

Baskoniako jokalariei eta langileei egindako probetan, berriz, jokalari guztiek eman dute negatibo. Hala ere, bost positibo antzeman dira probetan, denak ere langileak. Alaves-Baskonia taldeak atzo jakinarazi zuenez, «probak egitea izan da biderik onena kasuak azkar antzemateko, eta, orain, horri esker, prebentzio neurriak hartzeko moduan gara, gaitza gehiago ez kutsatzeko, ahal den neurrian behintzat».