TXIRRINDULARITZA. Euskal Herriko Itzulia apirilaren 4tik 9ra jokatuko da, eta EITBk atzo jakinarazi zuen zein izango diren sei etapetako hasiera eta amaiera tokiak. Hondarribian ekingo zaio Itzuliari, erlojupeko batekin. Biharamunean, etapa osoa Nafarroako lurretan ibiliko da. Leitzatik atera eta Vianan izango du helmuga. Hirugarren etapak Laudio eta Amurrio lotuko ditu, Araban barrena ibilita. Laugarren etapa Gasteizen hasi eta Zamudion amaituko da, Bizkaian. Bosgarrenak Zamudio bertatik irten eta Mallabian izango du amaiera. Azkenik, seigarren etapa Eibarren abiatu eta Arraten amaituko da, iaz bezalaxe.
Kern Pharmak, bestalde, atzo aurkeztu zuen datorren denboraldirako taldea, Vila Joiosan (Herrialde Katalanak). 24 txirrindulariz osatutakoa da talde nafarra, eta horietatik sei euskal herritarrak dira: Urko Berrade, Ibon Ruiz, Sergio Araiz, Jon Agirre, Diego Lopez eta Igor Arrieta. Hector Carreterorekin indartu dute taldea. Vueltan plaza lortzea eta UCI Pro Team kategorian maila ona ematea izango dira Kern Pharmaren helburu nagusiak. Horrez gain, Lieja-Bastogne-Lieja UCI World Tourreko klasiko entzutetsuan ariko da apirilaren 26an.
Zehaztu dira aurtengo Itzuliko sei etapak
Iruzkinak
Ez dago iruzkinik
Ordenatu