Iparraldean sartzeko, bezperako testa

DONOSTIA. Hego Euskal Herritik Ipar Euskal Herrira sartzeko, orain arte txertatu gabeko bidaiariek 72 ordu lehenago egindako test negatibo bat eduki behar zuten, COVID-19rik ez zutela frogatzeko; orain, Frantziako Gobernua 24 ordu lehenago egindako testak eskatzen hasiko da. Adierazi dute «Espainiatik eta Portugaletik» heldutako bidaiarientzat zorroztuko dutela neurria, herrialde bi horietan azkenaldian datuetan izan den gorakada handiarekin arduratuta. Adierazi dutenez, neurria asteburu honetan jarriko dute indarrean. Europako Gaietarako estatu idazkari Clemente Beaunek jakinarazi zuen neurria atzo, eta, bide batez, gogorarazi zuen herritarrei ematen dieten gomendioa dela aipatutako bi herrialdeetara bidaiarik ez egitea: «Nire erantzukizuna da esatea zenbait herrialdetan arriskua handiagoa dela, eta, beraz, horiek saihestera egin behar dela».

Osasun ziurtagiriaren erabilera zorroztera doaz Frantziako osasun agintariak herrialde barruan ere. Abuztuaren lehenetik, adibidez, taberna eta ostatuetan bezero guztiei eskatzen hasi beharko dute.