Hiru korronte aurkeztuko dira Ahal Dugu-ren primarioetara: Kaliangora, Zurekin Ahal Dugu eta Euskadi Baita Ere. Ahal Dugu-ko Ekintza Politikoko arduradun ohi Luis Alejosek kritikatu egin du primarioen “atzeratze ulertezina”. Horiek gauzatzeko garaia zehaztea Espainiako Podemosen zuzendaritzari dagokio, eta Alejosek uste du horrek kalte egiten diola Ahal Dugu-k euskal gizartean duen presentziari.
Alejos Kaliangora korronteko kidea da, Roberto Uriarte idazkari nagusi ohiaren aldekoa, eta primarioak egiteko beharra “larria” dela dio. Haren ustez, Ahal Dugu-k “lurraldeko zuzendaritza” ez edukitzeak erreferentzialtasuna galtzea dakarkio alderdiari: “Ahal Dugu-ren ahotsa argi eta garbi entzutea galerazten du, abenduaren 20ko hauteskundeetan botoetan lehen indarra izan zen arren”.
Harago joan da. Bake eta bizikidetza gaietan Ahal Dugu-ren presentziarik eza deitoratu du, haren ustez alderdiak proposamen “koherente eta pisuzkoak” baititu gai horretan. Besteak beste, gogoratu du Ahal Dugu-k ez zuela parte hartu Gernikan (Bizkaia) egin zen Foro Sozialean.
