PPren Euskal Autonomia Erkidegoko adarreko presidente Antonio Basagoitik adierazi du "prest" dagoela PSE-EEko buru Patxi Lopez lehendakari kargurako hautagaitzan babesteko, "baina ez doan". Haren ustez, Eusko Legebiltzarrerako hauteskundeetan bigarren eta hirugarren geratu diren indarren arteko akordioa "zilegi" da.
Basagoitiri jarraiki, PSE-EE ez da bozak irabazi dituen alderdia, "PSE-PP formula baizik". "[EAEko] Herritar gehienek alderdi hauei botoak ematea erabaki dute, aldaketaren alde eman dituztelako botoak".
ETBri eskainitako elkarrizketan, Basagoitik berretsi du PSE-EEri babesa emateko prest dagoela, "baina Patxi Lopezek nahi dituen alorretan ez ezik, aldaketaren eta askatasunen defentsaren bidean ere".
"Euskadiko politikak benetan aldatzeko akordioak beharrezkoak izango dira". Horregatik, PSE-EEri akordio hauek proposatzeko "ausardia" eskatu dio. Bere hitzetan, PSE-EErekin akordioak lortzeko "%120ko esfortzua" egingo du, baina "aldaketa" ez da "doako zerbait" izango.
Basagoiti "prest" dago Lopez babesteko, "baina ez dohainik"
Iruzkinak
Ez dago iruzkinik
Ordenatu
