Bigarren itzulia izango da Baionan, Angelun eta Miarritzen

Baiona, Angelu eta Miarritzeko auzapezek beren burua berriz aurkezten zuten 2001eko hauteskundeen ondotik lortutako kargua erreberritzeko.

Duela zazpi urte, Didier BOROTRA lehen itzulian pasa zen, botoen %54arekin. Aldi hortan, lau zerrenda aurkezten ziren Miarritzen. BOROTRArenaz gain, GOURRET-HOUSSEIN sozialista, Peio CLAVERIE abertzalea eta SAINT-CRICQ eskuindarra aurkezten ziren. Borotrak botoen %42a lortu ditu, sozialistak %16a, CLAVERIE abertzaleak eremandako ezkerreko zerrendak %14a eta SAINT-CRICQ jaunak %26a. Gehiengo nagusirik gabe, berriz bozkatu beharko dute miarriztarrek.

Eskema berdina Baionan. GRENETek bozen %44a lortu du, Aguerre sozialistak %25a, Ugalde eskuindarrak %16a, Baiona Berria zerrenda abertzalearen izenean aurkezten zen Beatrice PEYRUCQek %7a eta LCR alderdian bildutako komunista iraultzaileek %7a ere. Aguerre sozialista izanen du hautagai arriskutsuena Grenet auzapezak datorren igandean. Abertzaleek beren bi kontseilariak galtzen dituzte.

Angelun, 5 zerrenda zenbatzen ziren. Robert VILLENAVE auzapeza eskuindarra berriz aurkezten zen abertzaleen babesarekin eta bozen %36,53a lortu du. Bere parean, eskuineko beste bi zerrenda: Jean-Baptiste MORTALENAk (zentro-eskuina) eta Claudine GETTEN-PORCHEk botoen %12,58 eta %8,32a eskuratu dute. Jean ESPILONDO sozialistak du boto gehien eskuratu Angelun (%36,66) baina eskuinaren zatiketaren emaitza izan diateke, auazapez jaunak agertarazi duen bezala. ESPILONDOk adierazi du "atea zabalik" zuela eta "elkarrizketarako prest" dela. MORTALENAk bihar gauean hartuko du bere erabakia. Bozen %5,91arekin, LCReko komunistek indar erakustaldia egiten dute Angelun, baina zaila ikusten da bigarren itzulian ESPILONDO sustengatzea.