Zuhaitza kolpeka errotik atera
eta lur arrotzetara eraman zuten
bultza eta arrastaka.
Zortzi metro koadro porlanetan
sartu zuten zuhaitza
eguzki izpirik gabe,
haize heze gozorik gabe,
bakarrik.
Eta zuhaitz deserrotua
porlanari nola edo hala atxiki
eta berriro loratu bezain pronto,
kolpeka errotik atera zuten
eta lur arrotzagoetara eraman
bultza eta arrastaka.
Eta zuhaitza berriro errotu,
eta berriro kolpeka atera zuten
eta lur are arrotzagoetara eraman
bultza eta arrastaka.
Zortzi metro koadro porlanezko naturan,
eguzki izpirik gabe,
haize heze gozorik gabe,
beti kolpe, bultza eta arrastaka,
halako batean,
berez,
hil egin zen zuhaitza.
