Mikel Martinez EAJko legebiltzarkideak Rodolfo Ares Eusko Jaurlaritzako Herrizaingo sailburuari gaur eskatu dio Iñigo Cabacasen heriotzaren inguruko ikerketaren nondik norakoak azaltzeko, "segurtasun neurrien plangintzatik zoritxarreko jazoera gertatu arte" argibideak jakiteko. Horretarako, maiatzaren 18ko Legebiltzarreko bilkuran Ares interpelatuko duela aditzera eman du.
"Erantzukizun politikoak" bere gain hartzeko eskatu dio Aresi, baita "epaileen atzetik ezkutatzeari" uzteko ere.
"Ares sailburuak argudiatu du gaia eta informazio osoa epaitegietan dagoela, eta, beraz, ez dela posible Legebiltzarreko taldeei informazioa ematea, Legebiltzarreko kontrola saihestu nahian", salatu du Martinezek.
“Ez dugu onartuko argibide horiek bakarrik justizia epaitegietan ematea, ezta ere erantzukizuna polizia-operazioan parte hartu zuten funtzionario publikoengan uztea”, esan du.
