Baionako Herriko Etxeak antolatu duen ereduarekin bat ez datozenez, festak herrikoitzeko eredu propioa txertatuko diote hainbat eragilek.
Egitarau ofizialean aldaketa gutxi dago, eta hamaika kritika egin dizkiote herriko etxearen plangintzari. Festen bitartez euren mezua zabaltzen saiatu ohi dira hainbat elkarte: barnetik kanpora antolatzen dute eskaintza alternatiboa.
Gazte Asanbladak egunero egitarau propioa eskaintzeko helburua du, jai herrikoiak aldarrikatu eta Baionako festetan beste aukera batzuk luzatzeko: ostegunean, umeen eguna egingo dute; ostiralean, PAF alternatiba feminista baten alde eta Altxa Neskatxa talde feministekin batera, poteo feministarekin ikuspegi parekidea zabaldu eta eraso sexistak salatuko dituzte; larunbatean, Jeiki Eguna ospatu eta Ipar Euskal Herriko gazte dinamika sustatuko dute; eta igandea, bereziki, preso eta iheslariei eskainiko diete.
Okupazioaren aldeko kideek eta Bizi ingurumenaren aldeko eta globalizazioaren kontrako taldeak, besteak beste, ekimenak egingo dituzte, festak baliatuz euren mezua zabaltzeko, etorkizunean, errealitate bilakatzeko bestelako festa eredu bat.
