ETAk su-eten baterako eskaintza egiten duela berresten duela uste du Barrenak

ETAk atzo kaleratu zuen oharraz galdetuta, Pernando Barrena Batasuneko kideak uste du ETAk su-eten baterako eskaintza egiten duela. Barrenaren iritziz, Bergarako proposamenarekin ireki zen bide horrek "aukera errealak" ditu aurrera egiteko, baina aurrera egiten ez badu "aukera ikaragarri bat" galtzeko zorian egongo dela euskal gizartea, Euskadi irratiko tertulian nabarmendu duenez. Gainontzeko solaskideen esanetan, ETAren "itzalak" desagertu egin beharko luke prozesu horretatik. Bestalde, EAko Martin Aranburuk adierazi du, EAJrekin ez, baizik eta EA Aralarrekin joatea dela akordiorik balizkoena.

Barrenaren iritziz, ETAk orain hamabost egun kaleratu zuen lehen oharretik hona erreakzio batzuk egon dira, eta ETAk "bere borondatea berresten" du. "EAJk irudi ezkor bat eman du Bergarako proposamenaz hitz egitean, eta ateak itxi egin ditu", azpìmarratu du Barrenak. Halaber, Bergarako ekimenak "euskal gizartearen nahiarekin konektatzen" jakin duela nabarmendu du Batasuneko kideak, eta gainontzeko alderdiei "aukera historiko erreal hau galtzen ez uzteko" eskatu die.