Eusko Alkartasuna "berehala" hasiko da hauteskundeak prestatzeko lanetan

NaBai koaliziotik kanpo geratu ondoren, Eusko Alkartasuna "berehala" hasiko da bere "hauteskunde proiektua aurkezteko" lanetan. "Abertzaleen arteko elkarlanean, betorik gabe" egingo duela jakinarazi du ohar baten bidez. Nafarroako EAren zuzendaritzak berretsi egin du NaBai sortzea bultzatu zuten printzipioekiko konpromisoa, eta EA NaBaitik Aralarrek eta EAJk bota dutela salatu du. Horregatik, bi alderdi horiek NaBai izena eramatea ez dela zilegi adierazi dute: "Guztion artean garatu genuen proiektua izan zen, eta orain zenbait alderdiren interesengatik bertan behera geratu da, koalizioaren hasierako printzipioak urratuz". Eusko Alkartasunak hauteskunde batzorde bat osatuko duela jakinarazi dute.