Ezker abertzaleak bat egin du Euskal Herrian Euskaraz mugimenduak antolatutako Euskaraz Bizi Egunarekin, eta euskal herritar guztien "euskara ezagutzeko eta erabiltzeko eskubidea" aldarrikatu du. Maribi Ugarteburu ezker abertzaleko kideak gaur nabarmendu du euskarak "lehentasunezko estatusa" behar duela lurralde osoan.
"Jaia eta aldarrikapena uztartuko dira egun horretan, adierazteko gure hizkuntza dela gure bizi taupada", esan du Ugarteburuk.
Haren arabera, ezker abertzaleak Euskal Herrian "eragin nahi duen eraldaketa politiko eta sozialean" euskara "arlo guztietan presente dugun zeharlerroa" da, eta "izango da".
