Ezkerretik eskuinera

Carondeletetik helikopteroz ihes egin behar izan zuen herenegun Lucio Gutierrezek (Quito, 1957). Duela bi urte ailegatu zen bertara bozak irabazi eta indigenekin eta ezkerreko alderdien sostenguarekin koalizio gobernua eratu ondoren. Ezkerreko hautagai abertzalea zela esan zuen. Sei hilabete, alta, nahikoak izan ziren ezkerretik eskuinerako bidea egin eta koalizioa hausteko. Militar gisa ibilbide luzea du koronelak. Jamil Mahuad presidentearen kontrako estatu kolpea zuzendu zuen 2000. urtean. Gizarte Patriotikoa Alderdia sortu zuen ondoren. Abdala Bucaram presidente izandakoa ez epaitzeko hartutako neurria izan da bere agintaldiaren azken hutsegitea . Herritarrek ez diote barkatu. Ximena Bohorquez medikuarekin ezkonduta dago eta bi alaba ditu: Karina eta Viviana.