Federer-Nadal finala gizonezkoetan

Roger Federerrek eta Rafael Nadalek jokatuko dute Wimbledoneko gizonezkoen finala bihar. Biak ziren lehen bi zerrendaburuak.

Gaur jokatu dituzte finalerdiak, eta Federerrek 7-5, 6-3 eta 6-4 irabazi dio Richard Gasqueti.

Nadalek Novak Djokovic izan du kontrario, baina hau erretiratu egin da partida hasita zutela, ezkerreko hankako behatz txikiko minarekin. Hirugarren setean zihoazen, bosgarren jokoan. Lehen seta Djokovicentzat izan da (3-6), bigarrena Nadalentzat (6-1). Hirugarren setean Nadal zihoan aurretik.

Aurten Roland Garrosen ere Federer-Nadal finala izan da, eta azkenak irabazi zuen, aurreko bi urteetan bezala. Wimbledon, baina, ez du inoiz irabazi; Federerrek bai (azkeneko lau urteetan).