Hauteskundeak Frantzian: Sarkozyri aurrea hartu dio Frantziako ezkerrak herri eta kantonamendu bozetan

Nicolas Sarkozyk Frantziako presidente kargua hartu eta 10 hilabetera egin dira lehendabiziko hauteskundeak, eta ezkerreko zerrenden aldeko botoak nagusitu dira herri eta kantonamendu bozetan; hots, Frantziako tokiko hauteskundeetan.

Botoen %49 ezkerreko zerrendentzat izan dira, eta sozialistek berenganatu dituzte tradizioz eskuinekoak izan diren zenbait hiri garrantzitsu;Tolosa eta Estrasburgo dira esanguratsuenak. Parisek, berriz, alkate sozialista izaten jarraituko du.

Sarkozyren UMPk ere izan du garaipen txiki bat: lehia estuaren ondoren Marseillako alkatetzari eutsi baitio. Hala ere, alderdi barruan sortu dira emaitzak txarrak izan direla nabarmendu duten ahots batzuk. Jean-François Cope legebiltzarreko taldeko buruzagia izan da atsekabe hori argien agertu duena, "galtzaile" direla azpimarratu baitu. Sarkozyren inguruak, ordea, garrantzia kendu die atzoko emaitzei, tokikoak direla eta horrek ez duela estatuko erakundeetan islarik iritzita.