Imaz: "Batasunak politika egin ahal izatea nahi nuke gatazka Euskal Herriko kaleetatik kentzeko"

Josu Jon Imaz EAJko EBBko lehendakariak "espero" du Arnaldo Otegi "etxera itzuliko dela gaur lo egitera". Arnaldo Otegi Batasuneko kidearen aurkako auzi saioa atzeratu egin dela jakin baino lehen egin ditu Imazek adierazpenak."Bihar bere hiritar eskubideak izan ditzan nahi dut, alderdi desberdinek elkarrekin lan egin dezagun, Batasunak barne, gatazka konpontzeko", adierazi du Baionan eskaini duen prentsaurrekoan. "Batasunak politika egin ahal izatea nahi nuke gatazka Euskal Herriko kaleetatik kentzeko".

Otegirekin "solaskide" gisa harremana duela argitu du Imazek. "Espero dut etorkizunean ere hala izatea". Imazen ustez, Pernando Barrenak "erantzunkizunez" hitz egin zuen igandean. "Horrela jarrai dezaten nahi nuke eta ahal duten guztia egin dezaten bortizkeria kentzeko Euskadiko kaleetatik”.