Iñaki Garitaonandia 'Gari'

«Nik ez dut aberririk; nire aberri bakarra musika da. Abertzalea nintzen, baina gaztetan». Azken 30 urteetan Garik izandako bilakaera laburbil dezake esaldi horrek. Hara eta hona ibili da; Hertzainak taldeko abeslari hamar urtez, eta bakarlari moduan ondoren. Ospeak gazte harrapatu zuen, eta urteetan igarri du horren ajea. Musika izan du beti euskarri, eta orain ere ari da taldeko proiektu batean: Gari eta Maldanberan. Nahiago du aurrera begira egon, nostalgiarik gabe, eta, horren erakusle, beste disko bat grabatzen ari da orain.