Bizkaiko hautaketa prozesua amaitu ondoren, Jasone Agirre izango da EH Bilduren Bizkaiko zerrendaburua Eusko Legebiltzarrerako hauteskundeetan, Arnaldo Otegirekin (Gipuzkoa) eta Miren Larrionekin (Araba) batera.
Koalizioak nabarmendu duenez, hautaketa prozesuan parte hartzeko bide ugari eskaini dizkiete EH Bilduren oinarriei izenak proposatzeko eta botoa emateko: EH Bilgunean eta batzarretan zuzenean, Whatsapp eta Telegram bidez, eta EH Bilduren Komunitatea erabiliz.
Jasone Agirre Garitaonaindia 1968an jaioa da, Abadiñon (Bizkaia), eta ETBko albistegietan egiten du lan 1991. urtetik. EITBko Erredakzio Kontseiluaren sortzaileetariko bat izan zen, eta Berdintasun Batzordeko kidea da. Sariak jaso ditu indarkeria matxistaren inguruan egindako erreportajeengatik. Komunikazioaren teoriaren irakasle izan zen Mondragon Unibertsitatean; LABeko ordezkaria da ETBko Langileen Batzordean, eta, Gerediaga Fundazioan partaidea izateaz gain, Anboto Komunikabideetako presidentea da.
