Kutxa, BBK eta Vital Kutxan batzar bereziak egiteko eskatu du Euskal Herria Bilduk, hainbat gai landu eta horien gainean eztabaidatzeko. Koalizioak proposatu du Kutxabankek etxe kaleratze guztiak bertan behera uztea, eta 2008tik etxerik gabe utzi dituenei alokairu soziala bermatzeko neurriak hartzea, Etxebiderekin elkarlanean. Kutxabanken parte hartuko duten ordezkariek administrazio kontseiluko hurrengo bileran horren inguruan bozka dezaten eskatu du.
Horrez gain, kutxen pribatizazioaz eta Kutxabankeko administrazio kontseiluaren osaeraz eztabaidatu nahi du. Administrazio kontseilua “anitza eta demokratikoa” izan dadin proposatu du EH Bilduk.
