Poliziak bota egin ditu Kongresutik gertu, Neptuno plaza eta Pradoko pasealekuaren artean, kanpatuta zeuden haserretuak. Hiru egun zeramatzaten bertan, Espainia osotik egindako haserretuen martxa Madrilera iritsi zenetik.
Polizia Nazionalaren arabera kaleratzea arazorik gabe burutu da; haserretuetako batzuk ordea polizien bortizkeria salatu dute.
Ehun bat lagun Kongresuaren inguruan elkartu dira; azaldu dutenez beren asmoa ez zen diputatuei Kongresura sartzea oztopatzea, beren hausnarketak haiei helaraztea baizik. Trafikoa oztopatzen ari zirela-eta Poliziak bertatik atera ditu. Haserretuek ordea lortu dute nahi zutena, taldeko batek Kongresura sartzea lortu du dotore jantzita eta txostena entregatu du.
