PSOEko eta PPko buruzagiek datorren astean egingo dute bien artean hitzartu zuten Terrorismoaren Aurkako Itunaren inguruko batzarra. Hala aurreratu du bart Juan Fernando Lopez Aguilar Espainiako Gobernuko Justizia ministroak. "Bilera hori posible egingo duten baldintzak sortzen lanean ari da Barne ministroa", agertu zuen.
ETAren kontra politika bateratua lortzeko asmoan, PPk eskatu bezala Terrorismoaren Kontrako Itunaren Segimendu Batzordearen batzarra egitea onartu zuen astelehenean Jose Luis Rodriguez Zapatero Espainiako gobernuburuak. Hala ere, PPri ohartarazi zion ituna beste alderdietara zabaldu nahi duela, eta ez duela hasierako oinarrietan uzteko asmorik. "Baldintzarik gabe" joateko deia egin zion eskuineko alderdiari.
Mariano Raxoi PPko buruzagiak bestelakorik iragarri zuen atzo, ordea. ETAren kontrako borrokan Espainiako Gobernuarekin eta PSOErekin bat egiteko hainbat baldintza jarri zituen: hala nola, EHAK legez kanporatzea, elkarrizketaren aldeko Kongresuaren aldeko ebazpena bertan behera uztea, edo Egunkaria auzia-n Fiskaltzari agintzeko ahozko epaiketa abiatzeko.
PPk proposatutako baldintza horien aurka egitea erabaki zuten, ordea, atzo iluntzean Kongresuko beste alderdi guztiek.
PPk ETAren kontra jarritako baldintzen aurka egingo dute Kongresuko beste alderdi denek
Iruzkinak
Ez dago iruzkinik
Ordenatu
