Tontxu Rodriguez PSE-EEko senatariak berehala erantzun dio gizarte segurantza propioa izateko EAJk adierazitako asmoari. Azpimarratu du euskal pentsio sistema sortzea "arrisku bat" litzatekeela, argudiatuta "defizit garrantzitsua" eragin dezakeela kontuetan.
"Sozialistok ezin dugu onartu euskal herritarren pentsioak arriskuan jarriko lituzkeen abenturarik", esan du, eta ohartarazi PSEk Espainiarentzat gizarte segurantzaren kutxa bakarra defendatuko duela: "Pentsioak lurralde eta belaunaldi arteko elkartasun irizpideen bidez bermatu behar dira".
Zehaztu du 1979ko estatutuan ez dela "Gizarte Segurantzaren kutxa bakarraren haustura" aurreikusten, baina bai "kudeaketa ekonomikoaren transferentzia"; "hori sozialistok ulertu ahal izango genuke", erantsi du.
Zehazki, honela dio estatutuaren 18.2 artikuluak:
"Seguru Soziala dela eta, Euskal Herriari dagokio:
a) Estatuko oinarrizko legea lege berriz aurrera eramatea eta betetzea, berorren erregimen ekonomikoa itxuratzen duten arauak salbu.
b) Seguru Sozialaren erregimen ekonomikoaren gestioa".
