PSOEren agiriak osagai "positiboak" dauzkala, baina "defizit demokratiko bat adierazten" duela dio Larreinak

EAko idazkari Rafael Larreinaren aburuz, PSOEren agiriak osagai "positiboak" dauzka, baina "defizit demokratiko bat"ere adierazten du. "Agiriak elementu positiboak dituen arren, ez ditu benetako arazoak lantzen. Gauzak berdin jarraitzeko saio bat da PSOEren agiria", adierazi du Larreinak. Senatuaren berregituratzea eta autonomi erkidegoek Europan betetzen duten rola aztertzea agiriaren alde onak direla dio EAko idazkariak, baina Larreinaren ustez arazoa nola eta zertarako da.

PSOEk bere agirian, Espainiako Estatuan errealitate plurala dagoela ez duela onartzen adierazi du Larreinak. EAko idazkariaren ustez, ezagutzera eman behar diren nortasun nazionalak daude eta horiei adierazten eta erabakitzen utzi behar zaie. "Espainiako Estatuan hainbat nortasun nazional daude eta horiek euren erabakiak adierazteko eta erabakitzeko eskubidea dutela onartzen ez badu, ez dio arazoari helduko", esan du Larreinak.