Rafa Diez: "Prozesua ezin da egin bonbekin, ezta jazarpenarekin-eta ere"

Rafa Diez LABeko idazkari nagusiak gaur "berriro" esan du "bake eta konponbide politikorako prozesua bonbekin ezin" dela egin, "baina ezta salbuespen legeekin ere, edo ezker abertzalearen kontrako jazarpenarekin, ekinbide politikoa kriminalizatzen duten epaiketekin, mendekuan oinarritzen den espetxe politikarekin, ezker abertzaleak ezin badu beste alderdiekin berdintasunean aritu, mahai politikorik ez badago, Euskal Herriaren existentziaz aritzeko elkarrizketa politikorik ez badago eta denok ez badugu errespetatzen herritarren borondatea".

LABeko buruak ETAren "su-etena mantendu" egiten dela adierazi du, "eta ETAk berak, Espainiako Gobernuak eta alderdi politikoek anbiguotasuna gainditu" egin behar dutela, "prozesua eraikitzeko oinarri sendoak jartzeko". Haietako bakoitzak "borondate eta konpromiso aldetik behin betiko osagaiak jarri behar dituzte", Diezen ustez.