Rubalcabak guardia zibilen bertsioa babestu izan du beti

Alfredo Perez Rubalcaba Espainiako Barne ministroa zen Igor Portu tortura zantzu nabarmenekin Donostiako Ospitalera eraman zutenean. Hark hasieratik egin zuen bat Guardia Zibilaren bertsioarekin, eta Porturen zauriak atxilotu zutenean «erabili behar izan zuten indarkeriaren ondorio» zirela esan zuen. Hala berretsi zuen Porturen osasun txostena publiko egin ostean ere. Txosten hark Guardia Zibilaren bertsioa berresten zuela esan zuen, gainera. Zauriak Porturi «heltzerakoan eta hura geldiarazterakoan egindako maniobren» ondoriotzat jo zituen. «Gertaerek Guardia Zibilaren bertsioari bermea ematen diote», gaineratu zuen. Rubalcabak Barne Ministerioan jarraitzen du.