Samuel Sanchez: "Bihar Schlecki eta Contadorri gehien eusten diena izango da hirugarren Parisen"

Oso argi du Samuel Sanchez Euskaltel-Euskadi taldeko buruak: bihar Tourmalet gainean amaituko den etapan, "Andy Schlecki eta Contadorri gehien eusten diena izango da hirugarren Parisen". Frantziako Tourra amaitzeko lau etapa falta dira, eta gaur azken atseden eguna dute. Une honetan hirugarren da Samuel Sanchez sailkapen nagusian. Laugarren da Denis Mentxov, harengandik 13 segundora. Podiuma lortzeko Mentxov aurkari gogorra dela adierazi du: "Espainiako Vuelta bi aldiz irabazi du eta Italiako Giroa behin. Nik baino esperientzia handiagoa du eta erlojuaren aurkako etapetan ia beti irabazi izan dit".

Hala ere, garrantzitsua "hankak ondo edukitzea" dela adierazi du Sanchezek, eta berari "tenperatura jaistea eta euria egitea" interesatzen zaiola. uskaltel-Euskadikoak jakinarazi du berak ez zuela "horren goian egotea" espero, eta hirugarren postua nahi duela, laugarrena "postu txarra" delako, "txokolatezko domina".

Biharko etapa Tourmalet mendian amaitzeari buruz esan du "bukaera konplikatua" izango dela eta "denetik" pasa daitekeela. "Erlojupeko igoera baten modukoa izango da igoera. Tour honetan igoko dugun aldaparik gogorrena da".

Andy Schlecki (Saxo Bank) eta Alberto Contador (Astana) liderrari buruz galdetzean, bihar aurrenak "mugitu" beharko duela esan du: "Andyk jo behar du erasoa, Albertok azken garaipena lortzen errazago duela uste dudalako".

Bihar mendia berriro

Bihar, Tourreko 17. etapan, berriz ere mendia edukiko dute: Tourmalet maila berezikoan izango da amaiera, eta aurretik Marie Blanque eta Soulor lehen mailakoak igoko dituzte. Larunbatean erlojuaren aurka 52 kilometro egin beharko dituzte. Igandean bukatuko da Frantziako Tourra.

Orain arteko etapak

- Aitzin-etapa: Rotterdam-Rotterdam. Irabazlea: Fabian Cancellara. Liderra: Fabian Cancellara.

- 1. etapa: Rotterdam-Brusela. Irabazlea: Alessandro Petacchi. Liderra: Fabian Cancellara.

- 2. etapa: Brusela-Spa. Irabazlea: Sylvain Chavanel. Liderra: Sylvain Chavanel.

- 3. etapa: Wanze-Porte du Hainaut. Irabazlea: Thor Hushovd. Liderra: Fabian Cancellara.

- 4. etapa: Cambrai-Reims. Irabazlea: Alessandro Petacchi. Liderra: Fabian Cancellara.

- 5. etapa: Epernay-Montargis. Irabazlea: Mark Cavendish. Liderra: Fabian Cancellara.

- 6. etapa: Montargis-Gueugnon. Irabazlea: Mark Cavendish. Liderra: Fabian Cancellara.

- 7. etapa: Tournus-Rousses. Irabazlea: Sylvaine Chavanel. Liderra: Sylvaine Chavanel.

- 8. etapa: Rousses-Morzine Avoriaz. Irabazlea: Andy Schleck. Liderra: Cadel Evans.

- 9. etapa: Morzine Avoriaz-S. Jean de Maurienne. Irabazlea: Sandy Casar. Liderra: Andy Schleck.

- 10. etapa: Chambery-Gap. Irabazlea: Sergio Paulinho. Liderra: Andy Schleck.

- 11. etapa: Sisteron-Bourg les Valence. Irabazlea: Mark Cavendish. Liderra: Andy Schleck.

- 12. etapa: Bourg de Peage-Mende. Irabazlea: Joaquim Rodriguez. Liderra: Andy Schleck.

- 13. etapa: Rodez-Revel. Irabazlea: Aleksandr Vinokurov. Liderra: Andy Schleck.

- 14. etapa: Revel-Ax 3 Domaines. Irabazlea: Christoph Riblon. Liderra: Andy Schleck.

- 15. etapa: Pamiers-Bagneres de Luchon. Irabazlea: Thomas Voeckler. Liderra: Alberto Contador.

- 16. etapa: Bagneres de Luchon-Paue. Irabazlea: Pierrick Fedrigo. Liderra: Alberto Contador.