"Bilbo hiri baketsua da, horrelako gertaeretara ohituta ez dagoena", esan du Ibon Areso jarduneko Bilboko alkateak gaur goizean udaletxearen aurrean egin duten bilkuraren ostean. Aurreratu du Udalak San Frantzisko auzo inguruaren zaintza areagotuko duela, "gutxienez, denboraldi batez".
Bilkuran izan da Romeo Omebude Bilboko nigeriarren elkarteko kidea, eta hedabideei eskatu die ez hitz esateko gaur hil den emakumeari prostituta (bilkuraren ostean jakin da hil dela): "Izena du, Ada". Esan du beste emakume nigeriar batzuk prentsarekin hitz egiteko beldur direla.
