Unicef Nazio Batuen Haurren Laguntzarako Funtsak salatu du Sirian adingabeen aurka egiten diren erasoak ugaritu egin direla azken aldian. "Ehunka" haur hil direla eta beste zenbait zauritu direla salatu du Marixie Mercado Unicefeko bozeramaileak, baita haien aurka egiten diren "torturak eta sexu erasoak" ere.
Azken egunetan Homs hirian izaten ari diren bonbardaketek "haurrengan are sufrimendu gehiago" eragiten ari direla gaineratu du.
Pasa den astean Unicefek jakinarazi zuen gutxienez 384 haur hil dituztela Sirian (14 urte baino gutxiagokoak), eta 380 haur izan zirela istiluetan atxilotuak. Erakundeak "datu fidagarriak" direla adierazi du; inguruan dauden gobernuz kanpoko erakundeak hartu ditu iturritzat.
