'Visca L'Athletic-Gora Barça' gehigarri berezia kaleratuko du bihar BERRIAk

Dena prest dago Valentzian (Herrialde Katalanak) bihar gaueko Espainiako Kopako finaleko partidarako. Baita Bilbon eta Bartzelonan ere, noski. Baita BERRIAn eta VilaWeb-en ere. Bihar hamasei orrialdeko gehigarri berezia izango du irakurleak esku artean: Visca L'Athletic-Gora Barça. Euskaraz eta katalanez, elebitan idatzia. Berripaper honen eta VilaWeb katalanezko egunkari elektroniko nagusiaren eskutik.

Hamasei orrialdetan honako hauek bilduko ditu gehigarri bereziak: finalean sartzeko bidean Athleticek eta Bartzelonak egin duten ibilbidea, Jose Angel Iribar talde zuri-gorriko jokalari ohiarekin eta Bojan Krkic Bartzelonako jokalari gaztearekin elkarrizketak, Mestalla futbol zelaian jokatuko den finalaren aurrekoak... Guztia ele bitan. Guztia euskaraz eta katalanez, baita publizitatea ere.

"Horrelakoak gara zenbait euskaldun eta katalan. Ez dugu galtzen, ez dugu galdu nahi inolako aukerarik, adiskidetasun, elkarlan eta solidaritatezko loturak sendotzeko gure herrien, hizkuntzen, herritarren eta kulturen artean", azaldu dute gehigarrian bertan Martxelo Otamendi BERRIAko zuzendariak eta Vicent Partal VilaWeb-ekoak. "VilaWeb-entzat eta BERRIArentzat, bion gehigarri hau kaleratzeak erakusten du beste proiektu asko jar ditzakegula martxan, lanari ekiten badiogu. Nonbaitetik hasi behar eta, futbola aitzakia ona da. Horregatik esaten dugu Gora Barça eta Visca Athletic!". Izan ere, Partalek azaldu duenez, "banatzen gaituzten gauzak badauden arren, bakoitzak bere taldeak irabaztea nahi duelako, bi nazioen arteko adiskidetasuna aspaldikoa da, eta hori ere gogorarazi nahi genien zaleei".

Gehigarri berezia BERRIArekin eskuratu ahal izango da, bihar. Eta VilaWeb-ek sarean jarriko du, PDF formatuan. Horrez gain, 5.000 ale banatuko dira Valentzian bertan bi taldeetako jarraitzaileen artean. Futbolaren festa Bilbotik eta Bartzelonatik jarraituko duten zaleek ere izango dute gehigarri elebiduna eskuratzeko modua. Izan ere, 4.000 ale banatuko dira Bilbon, eta beste horrenbeste Bartzelonan; partida ikusteko jarri dituzten pantaila erraldoiak dauden lekuetan.