Alemaniako fiskaltzak aginduta, auto konpainiaren egoitza ugari arakatu ditu Poliziak, milioika autok gas isuriak trukatzeko softwarea zeramatela ezagutarazi eta gero. Tartean, egoitza nagusia miatu dute, Wolfsburgon.
Braunschweigeko fiskaltzak jakinarazi duenez, miaketen helburua da dokumentazioa eta euskarri informatikoak eskuratzea, auzian zerikusia izan dezaketen konpainiako langileak identifikatze aldera.
VWek trukatutako 11 milioi autoren artean Euskal Herrian zehazki zenbat saldu diren ez du argitu konpainiak, baina hemengo merkatuak Frantziakoan eta Espainiakoan zein zati duen ikusita, 35.000 eta 40.000 artean izan daitezke.
