Yemengo armadak Ali Abdula Sale presidentearen aurka dauden tribuak bonbardatu ditu bart Arhab eskualdean, eta hamar lagun hil ditu PressTV Irango telebista kateak jakinarazi duenez. Arhab eskualdeko tribuek presidentearen aurkako protestagileekin aliantza bat eratu dute, eta Saleren aldekoekin borrokan ari dira eskualdea kontrolatzeko.
Sale presidentea Saudi Arabian dago ekainean bere egoitzan jasan zuen erasoak eragin zizkion zauriak sendatzen. Riad hiriburutik ari da Yemen gobernatzen. Yemengo armadak AEBen eta Saudi Arabiaren babesa dauka protestak zapaltzeko. Jada protestak hasi zirenetik milaka lagun hil direla uste da.
