Elia Viviani (Sky) italiarrak irabazi du Italiako Giroko bigarren etapa. Lasterketa lasaia izan da oro har, eta aurreikusi bezala, esprintean amaitu da Albenaga eta Genova arteko ibilbidea. Polita eta garbia izan da esprinta, eta italiarrak merezita lortu du garaipena. "Hoflanden gurpilari segitzea erabakigarria izan da" esan du irabazleak helmugan. Bigarren egin du Lotto Jumpo taldeko Moreno Hoflandek. Haren atzetik sartu da esprintean norgehiagoka aritu den Andre Greipel (Lotto Soudal).
Gora behera handirik gabeko 177 kilometroko ibilbidea egin dute gaur Albenga-Genova bitartean. Bost txirrindularik ihes egin eta aurretik joan dira zenbait kilometrotan harik eta helmuga baino 10 kilometro lehenago tropelak harrapatu dituen arte. Pare bat eroriko izan dira lasterketan, baina ezer larririk ez da gertatu.
Lidergoa atzoko talde berean geratu da, Orican, baina Simon Gerransetik Michael Matthewsera igaro da mailota. Euskal txirindularien artean Movistar taldeko Ion Izagirrek egin du lanik txukunena gaur. 20. postuan sailkatu da.
