FUTBOLA
Hutsean berdindu dute Alavesek eta Eibarrek
Epaileak Riesgo atezaina egotzi du, baina Alavesek ez du baliatu.

Puntuak banatu dituzte Alavesek eta Eibarrek Mendizorrotzan jokatutako derbian. Puntu bana lortuta, Alavesek ez du aukera baliatu sailkapenean aurretik dituen taldeengana gerturatzeko, eta Eibarrek gero eta urrunago ditu Europako postuak.
Asier Riesgo Eibarko atezainak ikusitako txartel gorria baldintzatu du jokoa. 26. minutuan, baloia eskuarekin areatik kanpo ukitzeagatik kaleratu du epaileak, eta Eibarrek jokalari gutxiagorekin jokatu du ordubete luzez. Bat gehiago izanda, jokoan nagusitu egin da Alaves, eta izan ditu golak egiteko aukerak, baina ez ditu baliatu.
Lau jardunaldiren faltan, Eibar zortzigarrena da sailkapenean, 51 punturekin. Athleticek egingo duenaren zain, zazpi puntura du Reala, seigarren sailkatua. Alaves, berriz, 11. postuan da, 45 punturekin.
Astekaria
Asteko gai hautatuekin osatutako albiste buletina. Astelehenero, ezinbesteko erreportajeak, elkarrizketak, iritziak eta kronikak zure posta elektronikoan.