Presidentetzarako hautagaietako bakar batek ere botoen %50eko langa gainditu ez duenez, bigarren itzulian lehiatuko dira lehen bi hautagai bozkatuenak, alegia, Sebastian Piñera eta Alejandro Guillier, botoen %36,64 eskuratuta lehena eta %22,70ekin bigarrena. Presidentetzarako txartelik gabe geratu da, aldiz, Fronte Zabala mugimenduko hautagai Beatriz Sanchez.
Inkestek iragarritakoa baino gutxiagorekin konformatu behar izan zuten, hala ere, Piñeraren bozkatzaileek. Izan ere, zenbait iragarpenek aurreratu zuten itzuli bakarrarekin nahikoa izango zela eskuineko hautagaiarentzat.
Estatuko buruzagitzarako lehian ez ezik, Parlamentuan ere nabarmen gora egin du eskuinaren presentziak, Michelle Bachelet presidentearen aldeko zentro-ezkerreko koalizioaren kaltetan. 155 kideko parlamentu berrian Txilea Aurrera eskuineko koalizioarenak izango dira diputatuetatik %46 —%35,8 dituzte egun—.
Bestalde, eta aurten lehen aldiz, d'Hondt legea sartu da indarrean Txilen, eta beraz, proportzionaltasunean oinarrituko dira eserlekuak banatzerako garaian, alderdi txikien mesedetan.
