Gaur goizean atera dute argazki sinbolikoa Ipar Koreako eta Hego Koreako ordezkariek. Seulek eskaini eta Piongiangek onartu bezala, mugako Panmunjom herrian elkartu dira, 2016ko otsailean harreman zuzena eten zutenetik lehenbiziko aldiz. Bileraren helburu ofiziala zen aztertzea Ipar Koreak parte hartuko duen Neguko Olinpiar Jokoetan —Hego Korean egitekoak dira hurrengo hilabetean—. Ipar Koreak adierazi du talde bat bidaliko duela, eta Hego Koreak erran du hori "errazteko" aztertuko duela zigorrak behin-behinean kentzea. Hala ere, Roh Kyu-deok Atzerri Ministerioko bozeramaileak zehaztu du NBE Nazio Batuen Erakundeko Segurtasun Kontseiluari eta bertze "herrialde garrantzitsu batzuei" galdetuko dietela.
Ipar Korearen delegazioak Ri Son-gwon Korea Batzeko Batzordeko burua izan du ordezkari nagusi, eta Hego Koreakoak, berriz, Cho Myoung-gyon Bateratze ministroa. Kirol Ministerioko ordezkariak ere izan ditu ondoan.
Ipar Koreak joan den astean berrezarri zuen komunikazio zuzena Hego Korearekin, Panmunjom herrian duten zuzeneko linearen bidez. Chun Hae-sung Hego Koreako Bateratze ministrordeak gaur jakinarazi du Piongiangek erran diela komunikazio militar zuzena ere berrezarriko duela.
Bi urte harremanik gabe
Koreako gerra 1953an bukatu zen, bake hitzarmenik gabe. Ordutik, soilik armistizio bat dago indarrean. 2016ko urtarrilean, Ipar Koreak adierazi zuen laugarren saio nuklearra egin zuela, eta handik hilabetera proba bat egin zuen irismen luzeko misil batekin. Tentsioa anitz handitu zen, eta, zigor gisara, Hego Koreak erabaki zuen bi estatuek mugan partekatzen zuten Kaesong gune industriala ixtea. Piongiangek horren ondoren eten zuen Panmunjomgo linea zuzena. Orduz geroztik, harremanak erabat egin du okerrera. Ipar Koreak bertze bi saio nuklearren berri eman du —azkena, joan den irailean—, eta Nazio Batuen Erakundearen Segurtasun Kontseiluak zigor sorta batzuk ezarri dizkio bi urteotan —azkenak, duela bi aste—. Azken hilabeteotan tentsioa gori-gori egon da, ordea, bertzeak bertze Donald Trump AEBetako presidenteak erretorika gogorra erabili duelako Ipar Korearen aurka.
