David Machimbuko Palma hiriko alkateak AFP agentziari jakinarazi dionez, asteburuan hil zituzten hamar herritarren artean adingabeak ere bazeuden, nahiz eta ez duen kopurua zehaztu. Palmatik gertu dagoen Monjane herrian egin zuten erasoa, Tanzaniarekin muga egiten duen Cabo Delgado probintzian.
Iaz Ansar al-Sunna izeneko muturreko talde islamista hasi zen erasoak egiten probintzia horretan, Mozambiken xaria lege islamikoan oinarrituko den estatu bat eraikitzeko helburuz. Haren egiletza berretsiko balitz, ordutik egin duen eraso handienetakoa litzateke.
