Ostegunean hasi ziren euriteek ondorio larriak izan dituzte Japonian. Uholdeak eta luiziak eragin dituzte euriteek, milaka etxebizitza birrindu dituzte, eta hainbat herri guztiz bakartuta utzi.
Japoniako armada, polizia eta suhiltzaileak lanean ari dira eraikinen goialdeetan babes hartu duten herritarrak erreskatatzeko. Aldi berean, desagertutako 56 lagunak bilatzeko lanean ere ari dira erreskate zerbitzuak.
Hiroshima hiriko eskualdean izan da kalte gehien. Gutxienez 42 pertsona hil dira, eta beste hiru larri zaurituta daude, euriteek sortutako ezbeharren ondorioz. Ehimen —Japonia hego-mendebaldeko Shikoku uhartean—, berriz, 23 dira hildakoak oraingoz, azken datu ofizialen arabera.
Euriteek metro karratuko 1.600 milimetroko prezipitazioak gainditu dituzte Japonia hegoaldean, mendebaldean eta erdialdean. Uholdeek hiru metroko garaiera izan dute zenbait herritan, eta ur lasterrek eraikinak, errepideak, zubiak eta bestelako egiturak hondatu dituzte.
Japoniako Meteorologia Agentziak indargabetu egin du alerta gorena eremu kaltetuetan, baina abisuari eutsi dio hainbat eskualdetan, uholde eta luizi arriskugatik.
Agintariek 5,9 milioi herritarren ebakuazioa agindu dute asteburuan Japoniako hemeretzi eskualdetan.
