Hilabetean Euskal Herria gurutzatu ondoren Getxon bukatu da Euskarabentura

Emozioak pil-pilean, egindakoaz pozik eta harro, baina nekatuta. Horrela iritsi ziren atzo Euskarabentura espedizioko gazteak Getxora. 783 kilometro egin ondotik, atzo bukatu zen euskara ardatz duen espedizioa Getxon. Uztailaren 1ean Maule-Lextarren hasi, eta atzo bitarte Euskal Herriko zazpi probintziak gurutzatu dituzte espedizioa osatzen duten 130 parte hartzaileek. Olatz Silva BERRIAko kazetaria espedizioan izan da eta zuzeneko kontaketa egin du blogean.

Bizkaiko hiriburuan ernatu zen espedizioa bere azkeneko egunean.  Bilbon itsasontzia hartu eta Portugaletera joan ziren lehendabizi gazteak, han Bizkaia Zubia gurutzatu eta Getxora iritsi ziren. Getxon, bertako udalak harrera berezia egin zien.

Getxora heldu gara, #EuskarAbentura espedizioa heldu da helmugara, ZORIONAK!
Getxoko udalak harrera berezia egin digu! pic.twitter.com/0jDxg4Lyui

— EuskarAbentura espedizioa (@euskarAbentura) 2018(e)ko uztailaren 31(a)

Udalak egindako harreraren ostean emozioz betetako amaiera ekitaldia izan zuen espedizioak, Andres Isasi musika eskolan. Abenturako momenturik onenak biltzen dituen bideo bat ikusi zuten gazteek eta ondotik diploma banaketa egin zuten. Sormena lantzea izan da espedizioko helburu nagusietako bat horretarako sortzailen ezberdinak izan dituzte bidelagun. Astelehenean egin zituzten taldeka sormen lan horien aurkezpenak Bilbon eta boto gehien jaso zituen Apo Armatuak taldeak lana berriro interpretatu zuen bere lana amaierako ekitaldian. Bukatzeko, hilabete guztian zehar konposatu duten Euskarabentura kanta primizian kantatu zuten parte hartzaileetako batzuek.

🎤 Eta gazteek sortutako kantarekin amaiera ekitaldia bukatzen dugu. Mila esker denoi #euskarabentura -ren lehen edizioa hain berezia egiteagatik!#euskarabentura pic.twitter.com/5eeMz8wuKq

— EuskarAbentura espedizioa (@euskarAbentura) 2018(e)ko uztailaren 31(a)

Ekitaldia bukatuta senitartekoak zituzten zain gazteek. Malko artean agurtu zuten elkar abenturako kideek, hilabete elkarrekin egon ondotik “familia handi bat” bihurtu baitira denak. Antolatzaileak ere pozik azaldu dira espedizioak hasieran zehaztutako helburuak bete dituelako. Balorazio ofizialik egin ez duten arren, aurtengo arrakasta ikusita datorren urtean ere Euskarabentura egingo dutela uste dute antolatzaileek. Lanak bukatuta, atsedenerako tartea izango dute berriz antolaketa lanetan murgildu baino lehen.

Amaitu da Getxoko Andres Isasi musika eskolan ekitaldia. Amaitu da EuskarAbentura @berria #EuskarAbentura ❤ï¸Â pic.twitter.com/ZVBcVwyArK

— Olatz Silva (@olatz_silva) 2018(e)ko uztailaren 31(a)