“Laborantza elikatzaile baten alde” eginen du aurten Lurramak Irati gunean. Laborantzaren helburua “elikadura ekoiztea” dela azpimarratuz eta “kalitatezko elikagaiak ekoizten dituen laborantza” sostengatzen duenez, Lurramak Europako Laborantza Politika Bateratuak zentzu horretara jo dezan aldarrikatuko du. Egitarau aberatsaren artetik, hain zuzen, Europako laborantza ministro zenbaiten arteko negoziazioak erakusten dituen La Negociation filma erakutsiko da. Ondotik, politika bateratu horren erreforma helburu, “laborantza eta politika elikatzaile baten aldeko proposamenak” aurkeztuko dituzte aurtengo gazaitak, Gerard Choplin agronomo eta militanteak, Eric Andrieu eurodiputatuak eta Laurent Pinatel Confederation Paysanne sindikatuko bozeramaileak. (Hitzaldien egitarau osoa, hemen).
Bestalde, ohikoa denez, gomita bereziak izanen dira: aurten Poitou Charentes eskualdeko laborariak. Hango ordezkaritzak ezagutaraziko ditu lekuko arraza desberdinak —behiak, ahuntzak, astoak, mando eta zaldiak—. Biarritzeko ostalaritza lizeoko ikasleek hango elikagaiekin prestatuko dute ostiraleko afaria. Eskualdeko laborari baten hitzaldia ere entzuten ahalko da larunbatez.
Antolatzaileek jakinarazi dute hiru eguneko feria erraldoiak laguntzaile gehiagoren beharra baduela, eta dei egin diete bolondres lanetan aritzeko prest direnei izena eman dezaten.
