Euskaldunekiko diskriminazioa eta tratu bidegabea salatu ditu EH Bilduk, Eusko Legebiltzarreko Mahaiak, atzo, koalizioaren proposamen bat tramitera ez onartzea erabaki zuelako, euskara hutsean zegoela argudiatuta. Gaztelerazko itzulpena prest izan arte hari bide ez ematea erabaki zuen. Gaur eguerdian onartu du tramitera kontratu publikoetan klausula sozialak arautzeko EH Bilduren lege proposamena, eta Eusko Jaurlaritzari bidali dio hark aztertu dezan.
Proposamena atzeratzea erabakitzerakoan, mahaiaren jarreraren aurka agertu ziren Eba Blanco mahaiko lehen presidenteordea (EH Bildu) eta Cristina Makazaga bigarren idazkaria (Elkarrekin Podemos). Biek argudiatu dute EH Bilduk garaiz eta forma egokian aurkeztu duela proposamena eta, beraz, ez dagoela inolako oinarririk haren tramitea atzeratzeko.
EH Bilduk nabarmendu duenez, gaztelera hutsean aurkezten diren proposamenak inolako arazorik gabe onartzen dira tramitera, garaiz eta forma egokian aurkezten badira, euskarazko itzulpena izan arte zain egon beharrik gabe. Hori dela eta, euskaraz jardun nahi duten talde politikoekiko diskriminazioa salatu dute, eta babesa eskatu diete Hizkuntza Eskubideen Behatokiari, Elebideri eta Arartekoari. Koalizioaren arabera, EH Bilduko parlamentariei legebiltzarkide gisa dagozkien eskubideak urratu dizkie mahaiak.
Legebiltzarreko Mahaiak Legebiltzarraren Euskara Plana ez ezik, legebiltzarkide gisa dagozkigun eskubideak ere urratu dituelakoan, babesa eskatu dugu jada @behatokia, @Elebide, eta @Ararteko-an, dagozkion neurriak har ditzaten.#LegebiltzarreanEuskaraz
— EHBildu Legebiltzar (@ehbildu_legebil) 31 de enero de 2019
